Гаел Монфис ќе игра против Рафаел Надал во финалето на Мастерсот во Монте Карло, откако со убедлива игра во полуфиналето го елиминира сонародникот Жо-Вилфред Цонга.
Монфис победи во два сета (6:1, 6:3) за 69 минути игра. Монфис, во недела, ќе го игра своето 24-то финале во кариерата, а досега има освоено само пет титули.
Воедно финалето во Монте Карло ќе биде трето на турнирите од Мастерс серијата, во претходните две 2009 и 2010 во Париз тој губеше од Ѓоковиќ односно Содерлинг.
Во првото полуфинале Надал по речиси три часа игра го победи Енди Мари (2:6, 6:4, 6:2).
Надал по двегодишна пауза избори пласман во финалето на Мастерс турнирот во Монте Карло. Шпанецот, в недела, ќе игра во своето јубилејно 100-то финале во кариерата и ќе се бори за својата 28-та титула на Мастерс турнирите.
