Дрвениот панел на кој Роуз (Кејт Винслет) пловеше и успеа да преживее во филмот Titanic е продаден за 718.750 долари, јавува BBC.
Уште од прикажувањето на филмот во кината во 1997 година, обожавателите се прашуваат дали ова парче дрво не беше доволно за да го спаси и Џек (Леонардо ди Каприо) наместо тој трагично да заврши во ледената студена вода по потонувањето на легендарниот брод Титаник.
Аукцијата на реквизити во организација на Heritage Auctions се одржа во одморалиштето Planet Hollywood, а на аукцијата беа продадени и костими користени за време на снимањето на филмот.
Станува збор за реквизит кој претставувал дел од врата, а кој, според приказната на филмот, бил доволен Роуз да исплива на него и на тој начин да ја избегне смртта во ледениот Атлантски Океан.
Во една епизода од „Mythbusters“ од 2012 година, режисерот на Titanic, Џејмс Камерон, откри дека добил бројни пораки во кои многумина ја обвинуваат Роуз дека е себична и го нарекуваат Џек „идиот“.
Но, Камерон ја заврши дебатата велејќи дека според сценариото Џек „морал да умре“.
„Можеби згрешивме, реквизитот требаше да биде малку помал“, изјави тогаш познатиот режисер.
Реквизитот е долг околу 2,4 метри и широк 1 метар.
Меѓу другите реквизити продадени на аукцијата беше и камшикот од филмот Indiana Jones and the Temple of Doom кој достигна цена од 535.000 долари.
За костимот на Спајдермен кој го носеше Тоби Мегваер, клиент издвоил 125.000 долари.
Вкупниот приход од аукцијата беше 15,68 милиони долари.
