Стотици полицајци се распоредени во Берлин откако 22-годишен Сириец успеал да ѝ побегне на полицијата која по дојава за подготвување терористички напад во неговиот стан во источниот град Хемниц откри експлозив.
Полициските службеници се најприсутни на железничките станици и на аеродромите, соопшти полицискиот портпарол Винифрејд Венцел. Засилени безбедносни мерки се воведени и на берлинскиот аеродром „Шоенфелд“ каде автобусите не можат да дојдат до терминалите.
Се запираат и се пребаруваат сите автомобили и возила во потрага по осомничениот 22-годишен Џабер ал-Бакр, кој во Германија влегол минатата 2015 година како бегалец.
Германската полиција вчера попладне уапси тројца мажи осомничени дека се поврзани со осомничениот бегалец, за кого од службата за внатрешно разузнавање се добиени информации дека подготвувал бомбашки напад. Во неговиот стан во градот Хемниц при претресот е пронајден експлозив.
Двајцата се уапсени на централната градска железничка станица, а третиот во близина на станот во кој е вршен претресот во населбата Фриц-Хекерт. Населбата и станицата беа блокирани во текот на полициската операција.
„Експлозив со голема моќност е најден во станот во Хемниц“, соопшти полицијата на германската сојузна држава Саксонија, додавајќи дека од претпазливост морала да евакуира голем дел од населбата во градот.
