По неуспешните преговори со поранешниот шампион Тајрон Лу и асистентот на Филаделфија, Монти Вилијамс, раководството на Лејкерс се најде под голем притисок од јавноста. Во една вечер, сосем неочекувано, тие назначија нов тренер и нов асистент, кои ќе го предводат тимот во новата сезона.
Леброн Џејмс и дружината во Лос Анџелес конечно можат да здивнат, бидејќи од денеска веќе знаат кој ќе биде тренер на тимот во следната сезона. Се работи за Френк Вогел, тренер кој имаше исклучително успешни сезони со Индијана Пејсерс, а последниот ангажман му беше во Орландо Меџик.
Покрај главен тренер, тимот на Лејкерс синоќа доби и асистент. Џејсон Кид, кој претходно работеше како главен тренер во Бруклин Нетс и Милвоки Бакс, се согласи да биде асистент на Вогел во следната сезона. Кид е еден од најдобрите играчи на својата позиција во историјата на лигата, а неговиот ангажман е тесно поврзан со развивањето на Лонзо Бол – една од најсјајните ѕвезди во Лос Анџелес.
Откако Леброн Џејмс пристигна во Лос Анџелес, тимот го предводеше Лук Волтон, но раководството одлучи дека тој не заврши доволно добра работа и реши да го отпушти по крајот на оваа сезона.
Пред тимот на Лејкерс е бурно лето, во кое ќе се обидат да привлечат некоја од суперѕвездите чии договори истекуваат по сезонава. Но, тие мора да реагираат брзо и да го искористат овој прозорец од 2-3 години, во кои Леброн Џејмс се обврза за соработка со тимот. Титулата во моментов изгледа далеку, но најмување на нов тренер е еден чекор напред во вистинската насока.
