Голема тепачка на англиски и француски навивачи, во Марсеј, го „најави“ почетокот на Европското првенство во фудбал, кое во петок ќе стартува со натпреварот помеѓу Франција и Романија.
Тепачката во Марсеј, според непотврдени информации, започнала на терасите на неколку кафулиња кога англиските навивачи започнале да пеат: „ИСИС каде си?“. Ваквата провокација на англиските навивачи ги предизвикала домашните хулигани, кои започнале да фрлаат со столчиња кон Англичаните.
Тепачката се проширила и по градските улици поради што полицијата морала да интервенира со солзавец.
Англиските медиуми пишуваат дека тепачката ја започнале 40-тина хулигани, на што следувал жесток одговор на полицијата која се грижела за безбедноста. Неколку навивачи биле уапсени, а еден англиски навивач се здобил со полесни повреди.
Инаку, Англија во сабота во Марсеј ќе го одигра својот прв меч на ЕП против Русија.