Францускиот град Марсеј повторно беше боиште меѓу англиските, руските и француските хулигани пред натпреварот од европскиот фудбалски шампионат меѓу Англија и Русија.
Марсеј и во текот на Светското фудбалско првенство во 1998 година беше сцена на навивачки безредија, а тогаш се судрија англиските и туниските навивачи.
Околу 250 англиски навивачи се судрија со полицијата, која мораше да употреби солзавец. Околу пладне, француските хулигани за одмазда за дивеењето од претходниот ден, ги нападнаа Англичаните. Еден англиски навивач заврши во болница, а еден Французин е во притвор поради крадење дрес. Локалниот портал La Provance пишува дека во судирите со руските навивачи повредени се четири британски навивачи, а една жена е хоспитализирана.
Медиумите јавуваат и за судири меѓу руските и англиските навивачи во центарот на Марсеј, чијашто градска управа мобилизираше дополнителни илјада полицајци. На руските телевизии беа прикажани снимки на кои хулигански групи фрлаат столици од кафулињата и петарди.
На марсејските полицајци во расчистување на судирот им помогнале и руски полицајци кои се испратени во Марсеј и успеале да ги потиснат руските навивачи од местото на судирот.
Францускиот министер за спорт, Патрик Канер ја прогласи средбата меѓу Англија и Русија еден од најризичните натпревари на шампионатот, поради дивеењето на навивачите.
„Ова е еден од петте високоризични натпревари на турнирот, Англичаните и Русите се запалени и тоа може да биде експлозивно“, изјави министерот за телевизијата i-Television, говорејќи за веројатноста од избувнување на насилства од страна на навивачите.
Според него, Франција ги преземала сите мерки за да ја осигури безбедноста.