25 февруари 1944, Бугарите го убиле херојот Кузман Јосифоски - Питу

Еден од главните организатори на антифашистичкото движење (1938-1941) и на НОБ во Македонија (1941-1944) бил убиен на денешен ден во Скопје од страна на бугарски фашистички војник.

Роден во Прилеп на 23 јуни 1915, Кузман се борел за создавање на самостојна македонска држава и поради тоа бил цел и на Светозар Вукмановиќ - Темпо. Се залагал за формирање на македонски партизански одреди во останатите делови на етничка Македонија и нивна заедничка борба со Македонците од Вардарска Македонија, за целосно ослободување и обединување на македонскиот народ. Поради својата неуморна народно-ослободителна дејност многу луѓе го нарекуваат Гоце Делчев на НОБ (Вториот Гоце Делчев)

Во февруари му било кажано дека бугарската полиција дознала за неговата активност и тој морал да замине во партизани. Но, при обидот да го напушти Скопје, во Козле во близина на некогашната фабрика „Алумина“, бил убиен од бугарски војник. Таму денес постои спомен-плоча.

Бил прогласен за народен херој на Југославија на 2 август 1945 година, како еден од првите борци од Македонија кои го добиле тоа одликување.