5 август 1962, пронајдено било безживотното тело на Мерилин Монро
Околу 3 часот по полноќ, д-р Ралф Гринсон, психијатарот на Мерилин Монро, пријавил во полиција дека го нашол безживотното тело на најпознатата холивудска глумица од 50-тите години на минатиот век и секс-симбол.
Родена на 1 јуни 1926 година во Лос Анџелес како Норма Џин Мортенсон, станала позната во раните 50-ти под името Мерилин Монро благодарение на филмовите „The Asphalt Jungle“, „Love Happy“, „A Ticket to Tomahawk“, „Right Cross“, „The Fireball“ и „All About Eve“.
Подоцна се прославила со филмовите „Gentlemen Prefer Blondes“, „How to Marry a Millionaire“, „The Seven Year Itch“, „Bus Stop“, „The Prince and the Showgirl“ и „Some Like It Hot“.
Имала три брака, со Џејмс Доерти, Артур Милер и најпознатиот со бејзбол ѕвездата на Њујорк Јенкис, Џо ДиМаџио.
Обдукција покажала дека во нејзиниот систем имало 8 милиграмски процент од хлорал хидрат и 4,5 милиграмски процент од нембутал, а д-р Томас Ногучи од Иследничката канцеларија на Лос Анџелес ја прибележал причината за смртта како „акутно труење со барбитурати“ како резултат на „веројатно самоубиство“.