Авионот Embraer Legacy 600, во кој патуваше шефот на платениците на Вагнер, Евгениј Пригожин, не покажал знаци на неволја додека не почнал бргу да ја губи висината во последните 30 секунди, според податоците за следење на летот.
Росавијација, руската агенција за воздухопловство, рече дека Пригожин, кој го предводеше бунтот во јуни, бил еден од 10-те луѓе во авионот. Тој патувал од Москва кон Санкт Петербург кога се урна во близина на селото Куженкино во областа Твер, соопшти руското Министерство за вонредни состојби.
„Во 15:19 часот по Гринич леталото направи ненадејна вертикала надолу“, рече Јан Петченик од Flightradar 24. Во рок од 30-ина секунди, леталото, кое било 8,5 километри во воздухот, изгубило повеќе од 2.400 метри височина.
„Што и да се случило, се случи бргу“, рече Петченик, според Reuters.
Пред тоа драматично губење на висината „немаше индикации дека нешто не е во ред со авионот“, рече тој.
На видеото се гледа како авионот бргу се спушта со носот насочен речиси право надолу и од него излегува чад.
Руските истражители почнаа кривична истрага за да утврдат што се случило. Некои неименувани извори изјавија за руските медиуми дека веруваат оти авионот бил соборен со една или повеќе проектили земја-воздух. Reuters не можеше да го потврди ова.
Бразилскиот производител на авиони Embraer соопшти дека не обезбедил никаква услуга или поддршка за авионот, кој има 13 седишта, во последните години.
Во соопштението компанијата наведе дека ги почитува меѓународните санкции наметнати на Русија. Луксузниот авион беше идентификуван на Flightradar 24 со регистрација RA-02795, исто како и авионот што го превезуваше Пригожин во Белорусија по бунтот, рече извор од индустријата запознаен со ова прашање.
Интернет-тракерот за летови Flightradar 24 последен пат ја забележал позицијата на авионот во 15:11 часот, пред падот.
Flightradar 24 рече дека авионот поминал низ серија искачувања и спуштања по неколку илјади метри за 30 секунди пред катастрофалниот пад.