Германскиот Bild пишува дека главниот осомничен за вчерашниот терористички напад во Виена чинот го најавил на Instagram. Негови фотографии со оружје биле објавени на денот на нападот и терористот вчера на неговите пријатели им испратил снимка од нападот на Charlie Hebdo од пред 5 години.
Полицијата и понатаму ги истражува нападите низ центарот на Виена при што беа убиени најмалку три лица, како и еден од напаѓачите, додека 17 се повредени.
На фотографија од Instagram се гледа маж со брада и црна капа како позира со пушка, пиштол и мачета. Токму со тоа оружје беше вооружен и напаѓачот кој беше убиен од полицијата.
Најмалку еден од осомничените е во бегство. Низ улиците на Виена се распоредени околу 1.000 полицајци додека истрагата е во тек, а граѓаните се замолени да не доаѓаат во центарот на градот.
Австриските власти порачаа дека напаѓачот бил симпатизер на Исламска држава. Убиениот напаѓач е 20-годишно момче, родено и израснато во Виена. Тој бил еден од 90 австриски исламисти кои сакале да одат да се борат во Сирија.