Американскиот претседател Џо Бајден денеска ќе изврши рутински систематски преглед клучен за најстариот американски претседател досега, пред изборите што ќе се одржат во 2024 година.
Белата куќа вети дека ќе го објави лекарскиот извештај за 80-годишниот претседател. Бајден го имаше својот последен рутински преглед на 19 ноември 2021 година, вклучително и колоноскопија под општа анестезија.
Републиканската кампања за изборите во 2024 година веќе започна сериозно, така што овојпат наодот ќе биде под уште поголема лупа.
И покрај слабите резултати од анкетите, демократот Бајден веќе извесно време најавува дека има намера повторно да се кандидира, што може да доведе до реванш меѓу него и неговиот претходник Доналд Трамп.
Пред да биде ставен под анестезија, Бајден ги префрли своите овластувања на потпретседателката Камала Харис на 1 час и 25 минути, со што Харис стана првата жена со претседателски овластувања во американската историја.
Докторот на Бајден, Кевин О'Конор тогаш рече дека Бајден е здрав човек подготвен да ги извршува претседателските должности.
Но, тој укажа и на релативно мали знаци на старост, како што е вкочанетото држење на Бајден, кое го припишува на благото нервно нарушување кое ги погодува стапалата, како и честа кашлица предизвикана од рефлукс.
Бајден не пуши, не пие, спортува и нема сериозни здравствени проблеми од операцијата на мозокот во 1988 година.
Минатиот јули, тој беше позитивен на тест за КОВИД, но имаше само блага форма на болеста. Но, неговата возраст често е мета на републиканската опозиција.
Некои од неговите противници тврдат дека тој не е целосно трезвен и истакнуваат моменти на збунетост и неопределеност. Бајден во неколку наврати спомна дека пелтечел како дете.
Ники Хејли, 51-годишната републиканка која неодамна се приклучи на кампањата за изборите во 2024 година, во средата повика на психолошко тестирање на сите кандидати кои имаат над 75 години.
Тестирањето ќе се однесува и на поранешниот претседател Трамп, кој наполни 76 години, и кого Хејли го предизвика со нејзината кандидатура.
Хејли, поранешна амбасадорка во ОН, се надева дека тоа што американскиот електорат сака нови, млади лица во политиката, ќе ѝ оди во прилог. Анкетите покажуваат дека многумина подеднакво не сакаат ни втор мандат на Бајден, ни реизбор на Трамп.
