Документарниот филм „Trust No One: The Hunt for the Crypto King“ е на второто место на најгледани содржини на Netflix, веднаш зад „Bridgerton“.
По големиот успех на „The Tinder Swindler“, Netflix донесе уште една интригантна приказна за можна измама и ја истражува теоријата според која Џери Котен директор и основач на QuadrigeCX, некогаш најголемата крипто менувачница во Канада, ја лажирал својата смрт. Котен во текот на посета на Индија во декември, 2018 година бил примен во болница каде наводно починал од срцев удар.
Котен поседувал лозинки на корисници кои имале дури 190 милиони долари, па затоа не е чудно што неговата ненадејна смрт предизвикала сомнеж. Документарецот преиспитува можни објаснувања зад мистериозната смрт на Котен и изнесува потенцијални теории.
Некои од тие теории се дека Котен си ја лажирал сопствената смрт и избегал со парите на корисниците или дека бил отруен од сопругата Џенифер Робертсон, која била покрај него кога починал. Новинари и експерти даваат своја анализа на настаните, а корисниците се здружуваат и почнуваат детективска истрага за да ја разјаснат позадината на приказната.
Точноста за информациите на смртта на „кралот на криптовалутите“ се доведува до прашање и поради низа необични околности поврзани со трагичниот крај на Котен. На неговата посмртница името му е погрешно напишано, а два месеци пред смртта поранешен директор на компанија која ја водела болницата во која Котен почина е обвинет за финансиска измама.