Австралиската актерка Елизабет Дебики ќе ја игра Дијана, принцезата од Велс, во финалните две сезони на хит серијата „The Crown“ на Netflix.
Ѕвездата на „The Night Manager“ ќе ја „преземе“ улогата од Ема Корин која ја игра помладата Дијана во четвртата сезона што ќе има премиера есенва.
Дебики ќе им се придружи на Џонатан Прајс и Имелда Стантон во финалните две сезони на кралската драма во кои ќе бидат опфатени 90-тите и раните 2000-ти.
„Духот, зборовите и делата на принцезата Дијана живеат уште во срцата на многу луѓе. Навистина ми е чест и привилегија што се приклучувам на оваа мајсторска серија на која сум навлечена од првата епизода“, вели Дебики во изјава што беше објавена на официјалниот Twitter профил на „The Crown“.
Дваесет и деветгодишната актерка е позната по улогите во филмовите „The Great Gatsby“ и „Guardians of the Galaxy Vol 2“.
Во последните две сезони од серијата ќе биде опфатено распаѓањето на бракот меѓу Дијана и принцот Чарлс, како и нејзината смрт во 1997 година што го турна кралското семејство во криза.
Исто така се очекува да бидат опфатени смртта на принцезата Маргарет и смртта на Кралицата Мајка, настани што се случија во интервал од седум недели во 2002 година, како и Златниот јубилеј на кралицата Елизабета Втора истото лето.
Минатата недела беше соопштено дека актерот номиниран за Оскар Џонатан Прајс ќе ги „наследи“ Мет Смит и Тобијас Мензес во улогата на принцот Филип во четвртата и петтата сезона.
Имелда Стантон ќе ја замени Оливија Колман во улогата на Кралицата, а Лесли Менвил ќе ја игра принцезата Маргарет.
