Доцна синоќа банките кредитори на „Фени“ добиле нова понуда од бугарската компанија „Енекод“ за преземање на фабриката. Претставници од компанијата усно ги презентирале елементите на новата понуда.
„На банките им е потребно време да ја анализараат сериозноста, издржаноста и прифатливоста на понудата. Сепак, банките доверители потенцираат дека основен предуслов за докажување на сериозноста на понудувачите е претходно сопствениците најитно, најдоцна до почетокот на рочиштето закажано за 12 часот, да ја исплатат заостанатата плата на вработените од сопствени средства“, соопштија банките.
Кредиторите сметаат дека е можен повторен обид за одложување на рочиштето за отворање стечај за „Фени“, процес кој, според банките, е најдоброто можно решение за рестартирање на фабриката. Обидите за одложување на рочиштето банките ги оценуваат како спротивни на интересите и на директна штета на вработените и доверителите.
„Истовремено, информираме дека банките имаат добиено понуда од заинтересиран инвеститор, кој е подготвен веднаш по отварање на стечајната постапка да депонира 3 милиони евра во банка во Македонија, со цел подмирување на неодложните обврски/трошоци во постапката, вклучувајќи ги и платите на вработените и другите обврски“, велат банките кредитори на „Фени“.
Рочиштето за стечај на „Фени“ е закажано за денес во 12 часот во Основниот суд во Велес. Група вработени во фабриката најавија дека ќе се појават пред судот во знак на поддршка за наоѓање решение за „Фени“.