„Ова е брука од суд. Против мене се води политички процес“, рече поранешниот премиер, Никола Груевски, на денешното рочиште за предметот „Тенк“, за набавката на „мерцедесот“ од 600.000 евра.
„Ова е политички процес против мене како и сите обвиненија на СЈО. Не сум изненаден што не ни ги прифативте приговорите“, рече Груевски. На ова судијката Добрила Кацарска го опомена да не зборува за политика во судницата.
„Јас не би мешал политика, да не е ова политички процес. Може и новинарите да станат вештаци. Ова е брука од суд“, рече Груевски.
Претходно неговиот адвокат Димитар Дангов, побара од судијката утре да не се одржи рочиште. Според адвокатот, било нечовечки Груевски во шест дена секој ден да се појавува на судења што се водат против него. Судијката го прифати барањето и следното рочиште за „Тенк“ го закажа за в петок. Исто така, судот на денешното рочиште ги одби сите 5 приговори на одбраната.
