Иранската полиција уапси жена откако на интернет се појавија фотографии на кои таа и нејзината пријателка јадат во кафуле во Техеран без хиџаб, соопшти вчера нејзиното семејство.
Фотографијата почна да кружи на интернет во средата, прикажувајќи ги двете жени како појадуваат во кафуле кое, како и повеќето кафулиња во Иран, традиционално е под покровителство на мажи.
Една од жените на фотографијата, Доња Рад, полицијата набргу потоа ја уапсила. CNN разговараше со сестра ѝ, која рече дека безбедносните агенции стапиле во контакт со Доња и ја повикале да ги објасни своите постапки.
„По разговорот ја уапсија. Прво не се слушнавме неколку часа, а потоа накратко ми се јави Доња и рече дека ја ставиле во одделението 209 од затворот Евин“, вели сестра ѝ.
Техеранскиот затвор Евин е познат по тешките услови, режимот таму држи политички неистомисленици, а наменет е исклучиво за затвореници за кои е одговорно иранското Министерство за разузнавање.
Во последниве денови, безбедносните сили, наводно, уапсиле неколку влијателни Иранци, меѓу кои писателката и поетеса Мона Борзуеи, иранскиот фудбалер Хосеин Махини и ќерката на поранешниот ирански претседател Али Акбар Хашеми Рафсанџани, Фаезех Рафсанџани.
Повеќе од илјада луѓе поврзани со протестите се приведени од минатиот викенд, според државната новинска агенција IRNA.