Исламската држава презема одговорност за нападот во Манчестер арена, во кој настрадаа 22 лица, пренесува агенцијата ТАСС. Припадниците на терористичката организација на социјалните мрежи објавиле видеоснимка во која преземале одговорност за нападот, јавува порталот Акбар Ирак.
Четири часа пред нападот во Манчестер, пак, на еден профил на социјалната мрежа Twitter биле објавени два твита со кои се упатува закана кон Арената во Манчестер, а покрај заканите во твитовите била објавена и слика со знамето на ИС.
Twitter потоа блокира многу профили кои упатија пофалби за нападите, но нивниот број и натаму е голем. Многу од нив упатија повици до „осамените волци“ да вршат напади во земјите од Западот.
Дел од твитовите велат дека експлозијата во Манчестер била одмазда за нападите над децата во Мосул и Ал-Рака. Британските безбедносни служби го третираат случајот како терористички акт и веруваат дека лицето со бомбата загинало во нападот.
