Италијанската влада го блокираше обидот на компанијата Sinochem која е во сопственост на кинеската влада, да преземе контрола над Pirelli, гигантот кој произведува гуми, јавува БиБиСи.
Sinochem е најголем акционер во Pirelli со сопственички удел од 37%, а блокадата на преземање контрола над сопственоста се случи во време на тензии помеѓу Пекинг и Западот.
Pirelli во неделата им соопшти на инвеститорите дека италијанската влада донела одлука со која само Camfin, компанијата под контрола на шефот на Pirelli, Марко Тронхети Провера, може да именува кандидати за свој директор. Од Pirelli истакнуваат дека владата одлучила дека сите промени во корпоративното управување на компанијата мораат да бидат предмет на службена контрола.
Во 2015 година, Pirelli беше продаден за 7,1 милијарди долари на група инвеститори кој ги вклучува и компаниите ChemChina и Camfin. Шест години подоцна ChemChina се спои со фирмата Sinochem во сопственост на кинеската влада. Инвестицискиот фонд Silk Road исто така поседува 9% удел во Pirelli.