Една најнова студија покажа дека дрвјата во градовите навистина ги спасуваат животите на луѓето.
Истражувањето, кое беше објавено во научното списание Lancet, покажа дека садењето повеќе дрвја во европските градови може да ја намали стапката на смртност за 40 проценти. Студијата опфати 93 градови со просечна покриеност на дрвја од 15 проценти.
Утврдено е дека просечната температура може да се намали за 0,4 степени Целзиусови, со зголемување на покриеноста на дрвјата за 30 проценти. Земајќи ги предвид податоците од 2015 година, кога сите податоци беа последен пат достапни, се проценува дека 2.544 смртни случаи (39,5 проценти) од 6.700 луѓе кои починале од срцеви проблеми можеле да бидат спречени.
Високите температури може да предизвикаат ефект на „топол урбан остров“ доколку нема доволно зелени површини во градовите. Ова се случува кога асфалтот, железото и бетонот ја апсорбираат и задржуваат топлината. Температурите во такви околности стануваат опасно високи.
Утврдено е дека овој проблем е најизразен на југот и на истокот на Европа. Температурата на Стариот континент во 2015 година била во просек за 1,5 степени повисока. Во романскиот град Клуж-Напока, чија покриеност со дрвја е само седум отсто, температурата била седум степени повисока од околината.
Според податоците на Обединетите нации, 2,5 милијарди луѓе треба да живеат во градовите до 2050 година. Ефектот „вжештен урбан остров“ ќе биде уште поизразен поради употребата на фосилни горива.
Лондон и Барселона се меѓу градовите кои имаат за цел 30% од нивната градска површина да биде покриена со дрвја. Како што пишува весникот Energy and Buildings, друг метод за борба против споменатиот ефект е зазеленувањето на покривите на зградите. Покрај тоа, се предлага да се користат бои кои ќе рефлектираат повеќе светлина.
