Џо Бајден е изгласан за 46-ти претседател на САД и под негово водство се очекуваат радикални промени во однос на неколку горливи проблеми со кои американското општество се соочуваше под водство на актуелниот претседател Доналд Трамп.
Откако веста за прогласената победа на демократскиот кандидат доцна утринава (по локално време) молскавично се прошири низ целата земја, во повеќе градови на САД до пладне се собраа толпи од илјадници, претежно млади луѓе, да го одбележат доаѓањето на нивниот претседател.
По сѐ изгледа имаат добри причини за славје.
За време на кампањата одбележана со пандемијата на новиот коронавирус, Бајден се претстави како поборник за науката и вети доделување милијарди долари за истражувања поврзани со борбата против вирусните заболувања како COVID-19. Тој доби поддршка од целата научна заедница на САД, која обично е аполитична и не се меша во избори. Таква поддршка дојде од организациите како „Scientific American“ и „Nature“.
Бајден повика на обврзно носење маски и достапно тестирање за секого. Тој повика и да се оддржуваат дневни COVID-19 брифинзи во обид да се запре напливот од дезинформации за зауздување на вирусот.
Бајден се постави и како поборник на имиграцијата во САД. Вети дека ќе стави крај на нехуманото раздвојување на бегалските семејства на јужната граница на САД, повика на запирање на изградбата на ѕидот кон Мексико, на враќање на законот ДАКА (за интеграција во општеството на децата донесени од Јужна Америка), укинување и на таканаречената забрана за патување на муслиманите во САД, како и други олабавувања на строгата имиграциската полиика на САД воведена за време на Трамп.
Во врска со здравственото осигурување, тој вети одбрана и надградба на законот за општо здравство, таканаречениот „Oбамакер“, еден од најголемите успеси од времето на Барак Обама. Најави и други промени како забрана за поднесување ненајавени сметки за здравствени услуги и намалување на цените на лековите.
Покрај овие политики, Бајден ќе охрабри сеопфатни законски реформи во однос на полицијата и судовите, националната безбедност и социјалната еднаквост, како и драстично свртување во полза на климатските промени, кои досегашната Бела куќа ги негираше, што резултираше со напуштање на Парискиот договор.
За време на кампањата, Бајден промовираше индустријата да се префрли на чиста енергија, намалување на зависноста од јаглеводородни енергенси како нафта и гас, нови мандати за намалување на издувните гасови.
Сепак, главниот фокус на новата Администрација ќе биде подигање на економијата ставена на колена од коронавирусот, заздравување на односите со сојузниците од ЕУ и НАТО, и поцврста надворешната политика посебно во однос на Кина и Русија.
