Актерката Ања Тејлор-Џој доби одлични критики за улогата во мини серијата „The Queen’s Gambit“, освои и Златен глобус за најдобра актерка, а сега е познато и колку пари заработи за улогата на генијална шахистка.
Британскиот The Sun пренесе дека актерката на нејзината сметка кон крајот на минатата година имала износ од 645.412 фунти, додека една година претходно имала 148.477 фунти. Сметките покажуваат дека платила данок од 97.300 фунти.
Со други зборови, тоа би значело дека ликот на Бет Хармон ѝ донесе заработка од половина милион фунти.
Ана овие денови призна дека веројатно уште долго време нема да биде свесна за огромниот успех што го постигна во серијата, но вели дека морала да даде сè од себе во ликот, откако ја прочитала книгата според која серијата е инспирирана.
„На сетот се шегувавме дека му го враќаме сексапилот на шахот, но навистина не мислевме дека луѓето така ќе го сфатат тоа. Мислам дека никој не би шетал наоколу и би зборувал како го оживеал шахот. Веројатно за пет години ќе го разберам сето тоа што се случи“, изјави таа во интервју за Vanity Fair.
Актерката моментално работи на нов филм во кој ќе глуми покрај Марго Роби, Кристијан Бејл и Роберт Де Ниро.
Сè уште не се познати насловот и дејството на новиот филм, но за Showbuzz таа изјави дека е многу возбудена што работи со толку ѕвезди.