Претседателот на Европскиот Совет, Шарл Мишел објави синоќа пред полноќ дека на состанокот на лидерите на земјите членки на ЕУ во Брисел е постигнат договор за забрана на увоз на руска нафта.
Лидерите велат дека постигнале договор до крајот на годината да запрат 90% од увозот на руска нафта, пренесе Reuters. Унгарија го доби исклучокот што го бараше.
Целата нафта што се пренесува преку море ќе подлежи на ембарго, како и делот од нафтата што се пренесува преку нафтоводот Дружба кон северните земји, односно Полска и Германија. Нафтата што Дружба ја носи кон јужните земји, Унгарија и Словачка пред сѐ, ќе биде изземена согласно политичкиот договор склучен на лидерско ниво.
Амбасадорите на земјите членки на ЕУ овој договор ќе го преточат во законски текст, најави претседателот на Европскиот Совет, Шарл Мишел. Изземањето на земјите без излез на море е исто така привремено, потенцираше Мишел.
„До крајот на годината 90 отсто од руската нафта ќе биде забранета, а ќе се навратиме што поскоро на привремениот исклучок“, рече Мишел.
Освен ембаргото врз нафтата, лидерите се согласија да ја исклучат најголемата комерцијална руска банка, Сбербанк, од системот СВИФТ, да се забранат низа руски компании во ЕУ и да се забранат уште три руски државни медиуми.
Постигнат е и политички договор да се обезбедат девет милијарди евра финансиска помош на Украина.
