Норвешкиот писател Јон Фосе е добитник на Нобеловата награда за литература, објави во четвртокот Шведската академија.
Наградата за литература е една од петте награди утврдени со тестаментот на Алфред Нобел од 1895 година, се доделува од 1901 година и се смета за една од најважните и најпрестижните награди за книжевно творештво.
Во образложението се вели дека норвешкиот писател Јон Фосе е награден со Нобеловата награда „за иновативните драми и проза што му даваат глас на неискажливото“.
Фосе бил информиран дека ја добил наградата и им рекол на членовите на Академијата дека е „преплавен од емоции и малку исплашен“.
Јон Фосе е роден во Хаугесунд во 1959 година и денес е најпознатиот норвешки драматург по Хенрик Ибзен. Напишал повеќе од четириесет драми кои се преведени на педесет јазици.
Фосе е роден 1959 година во норвешкиот град Хаугесунд, а во неговото детство преживеал сериозна несреќа поради која безмалку го изгубил животот. Ова искуство има оставено длабока трага во неговите дела.
Неговиот дебитантски роман „Црвено, црно“, објавен 1983 година, е напишан на ниноршки, еден од двата официјални јазични дијалекта на норвешкиот јазик. Ова претставува значајно дело поради неговата бунтовност и емотивна суровост, која ја обработува темата на самоубиство, која на повеќе начини се преплетува и во неговите подоцнежни дела.
Покрај признанието, Фосе ќе добие и парична награда од 11 милиони шведски круни (нешто помалку од милион евра) од наградниот фонд на Нобеловата награда.
Фосе се сметаше за аутсајдер во годинешната трка за Нобеловата награда – според шансите во обложувалниците фаворити беа кинескиот писател Кан Сју и јапонскиот писател Харуки Мураками.
