Повеќе моќност, помалку килограми: BMW M3 CS

BMW ќе го понуди M3 CS во ограничен број примероци, а клиентите можат да сметаат на 8-брзински автоматски менувач и адаптивно возење преку двете оски (xDrive).

Во М одделот на BMW користеа сличен рецепт што го понудија со М3 од претходната генерација, па со ознаката CS овој пат пристигнува М3, кој е полесен и помоќен од верзијата на M3 Competition врз чија основа беше направен.

Повеќе моќност со помалку килограми значи дека познатиот трилитарски линиски 6-цилиндричен битурбо мотор (S58) во овој случај развива 550 коњски сили и 650 Nm максимален вртежен момент, што ќе го придвижува автомобилот кој е 34 килограми полесен од M3 Competition. (510 КС).

Помалата тежина е резултат на обилната употреба на јаглерод, кој се користи за неколку компоненти на каросеријата, вклучително и капакот на моторот, а за „диетата“ помогнаа и елементите на издувниот систем изработен од титаниум, карбонските школки на предните седишта и ултра лесни 19 и 20-инчни зајакнати бандажи со гуми Michelin Pilot Sport Cup 2 димензии 275/35/19 напред и 285/30/20 назад.

Најмоќниот М3, чие производство започнува во март, забрзува од 0 до 100 км/час за 3,4 секунди и развива електронски ограничени 302 км/час. Во Минхен рекоа дека ќе биде понуден во ограничен број примероци. Не ја открија бројката, но открија дека за CS (Competition Sport) во Германија треба да се издвојат 146.000 евра.