„Најмалку 19 лица се повредени во серијата експлозии во индустриски комплекс во градот Поличка во Северна Моравија, на североистокот од Чешка“, изјави за медиумите портпаролот на противпожарната служба Алеш Черногорски.
„Меѓу ранетите има и пожарникари. Од 19 повредени, тројца се здобиле со тешки повреди“, рекол портпаролот. Тројца од повредените се пожарникари спасители.
Истовремено портпаролката на чешката полиција Хана Кајзерова потврди дека експлодирала цистерна со експлозивни супстанции.
„Експлодираше цистерна, наполнета со експлозиви. На територијата на претпријатието потоа избувнал пожар“, додала.
Гаснењето на пожарот е исклучително тешко. На територијата на претпријатието има цилиндари со компресиран гас и други експлозивни средства. Полицијата ги потврди информациите на медиумите дека од фабриката одекнувале неколку последователни експлозии.
Според Черногорски, пак, пожарот е локализиран во неговиот епицентар, и додал дека засега нема закана од проширување на огнот. Во справување со огнот биле ангажирани 13 противпожарни бригади.
Првата експлозија во фабриката одекнала околу 11 часот по локално време, а потоа следувале уште неколку детонации, кои ги оневозможиле спасителите веднаш да дејствуваат на самото место, додала Кајзерова порачувајќи на локалното население се уште да не се приближува до местото на инцидентот.