И понатаму трае драмата околу спасувањето на 12 деца од Тајланд и нивниот фудбалски тренер од поплавената пештера, а сега почина и еден од спасувачите, во обид да им се помогне на децата.
Почина поранешен член на тајландската морнарница, нуркачот Саман Гунану, кој ја загуби свеста при излегувањето од пештерскиот комплекс, каде доставуваше боци со кислород, пренесува „BBC“.
„Неговата задача беше да испорача боци со кислород. Тој немаше доволно кислород за себе додека се враќаше“, изјави еден тајландски функционер, па додаде дека станува збор за човек кој некогаш работел во морнарница, а сега се приклучил во акцијата за спасување.
„Во пештерата е тешко. Тој се удави при обид да излезе од пештерата. Неговиот колега се обиде да му пружи прва помош, но не успеа. Кога го извлековме повторно се обидовме да му пружиме прва помош, но не реагираше, а потоа го префрливме во болница“, изјави командантот на тајландската морнарница.
Ова дополнително ги зголеми стравовите и ги намали надежите, дека заглавените деца и нивниот тренер би можеле да бидат извлечени со нуркање. Докторите и од порано проценија дека тие се премногу слаби за да издржат долго нуркање преку лавиринтот во пештерата, кој и онака е тежок и за професионалните нуркачи.
За целата работа да биде уште полоша, волонтерите спасувачи, наместо да испумпаат вода од пештерата, тие впумпаа дополнителна количина на вода во неа, а метеоролозите најавуваат нов бран на врнежи од дожд.
Поради овие околности, некои експерти проценија дека децата и тренерот би можеле да останат заглавени во пештерата во наредните четири месеци.
Исто така, загрижува и фактот дека нивото на кислород во делот од пештерата, во кој се наоѓаат децата, полека се намалува. Засега, децата се во добра здравствена состојба и редовно им се доставуваат храна и лекови.
