Податоците од минатата година покажуваат дека дури 74% од граѓаните наместо автомобил користат јавен превоз, возат велосипед или пешачат.
Девет од десет граѓани на Виена барем повремено користат јавен превоз, а 32% секојдневно патуваат со јавен превоз. Исто толку дневни рути се поминуваат пеш, додека 10% возат велосипед. Сè на сè, три четвртини од виенската популација секој ден користат алтернативи за автомобили.
Во споредба со другите европски градови, употребата на автомобили е на дното на скалата со само 26%. Податоците од последните 30 години покажуваат дека возењето автомобил постојано опаѓа во корист на јавниот превоз. Бројот на лични возила, кој во 2004 година изнесуваше 403 возила на 1.000 жители, се намали на 364.
Додека велосипедскиот сообраќај пред 30 години беше само 3%, во 2019 година скокна на 7%, а лани на дури 10%. Така, во 2023 година во Виена се регистрирани речиси 12 милиони велосипедисти, што е за 3% повеќе од претходната година. Во 2023 година во велосипедска инфраструктура се инвестирани 35 милиони евра.
Исто така, благодарение на 46 проекти годинава ќе се изградат дополнителни 20 километри велосипедски патеки. Одржливата мобилност носи бројни предности: го намалува метежот, сообраќајната бучава и потрошувачката на енергија, го подобрува квалитетот на воздухот и животот на населението и создава простор за повеќе зелени површини на јавните површини.