2 април 1982, Аргентина извршила инвазија на Фолкландските Острови

На денешен ден почнала аргентинската инвазија која подоцна се манифестирала во Фолкландската војна помеѓу Аргентина и Обединетото Кралство.

Аргентина ги нападнала Фолкландските Острови како и други британски територии во Јужниот Атлантик (Јужна Џорџија и Јужните Сендвич Острови). Армијата на воената хунта која од 1976 година владеела во земјата лесно излегла на крај со малубројниот британски гарнизон. Во тој момент на островите имало околу 1.800 луѓе, претежно англиски фармери.

Подоцна Британците го возвратиле ударот, а војната завршила на 14 јуни со британска победа. Загинале 655 аргентински и 255 британски војници.

Островите се во британска сопственост од 1833 година, но уште оттогаш Аргентина ги смета за свои и ги нарекува Малвински Острови.