Латино хитовите „Despacito“ и „Mi Gente“ во голема мера ги дефинираа мзуичките текови на популарната музика во 2017 година и го префрлија фокусот на латиноамериканската музичка сцена.
Песната „Despacito“ на порториканскиот пејач Луис Фонси и „Mi Gente“ на Џеј Балвин од Колумбија се најслушани хитови во 2017 година.
Видеоспотот за „Despacito“ стана најгледаниот видеоспот на YouTube на сите времиња со 4,5 милиони прегледи, а „Mi Gente“ со 1,4 милијарди прегледи се најде на третото место на најгледани видеоспотови во 2017 година.
Шест од десетте најгледани музички видеоспотови на YouTube се на музика на шпански јазик.
Доказ дека латино музиката доживеа експанзија годинава е фактот дека ова беше трета песна на шпански јазик што се искачила на првото место на листата на Билборд во САД.
Прва беше „La Bamba“ во 1987, па „Macarena“ во 1996 и сега „Despacito“. Иако во меѓувреме имаше многу влијателни латино музичари како Рики Мартин и Глорија Естефан, никој не го очекуваше успехот што латино музиката го доживеа во 2017 година.
За популарноста на Луис Фонси и Џеј Балвин секако придонесоа и американските ѕвезди кои се „заразија“ со овој свук, па сами им се нудеа да им се придружат на официјалните ремикси.
Така, Џастин Бибер придонесе за популарноста на „Despacito“, а Бијонсе им се приружи на Балвин и Вили Вилијам во песната „Mi gente“ значително подоцна откако песната стана хит.
Кој уште купува албуми?
Опцијата за стримување музика ја смени целата музичка индустрија. Во САД дури 82% од стримуваната музика е латино, а претплатите се зголемиле за речиси 72%. Ова е прв пат Латинска Америка да има прилив на пари благодарение на сопствената музика, истакнува Ребека Леон, менаџерка на Џеј Балвин и Хуанес.
„Порано имаше многу повеќе пиратерија, немаше шанси да се продаде содржината. Одеднаш, целиот овој регион во кој доминираше пиратеријата стана важен за издавачките куќи. Меделин стана епицентар на латино движењето, а тоа стигна до Мексико Сити каде на музичарите им се остварува латино сонот“, вели таа.
Леон додава дека експанзијата на латино музиката во 2017 година е предвесник дека популарната музика ќе се менува во иднина и дека ќе има повеќе интернационални музички сотработки, па музичките ѕвезди нема да пеат само песни на англиски јазик.