31 март 1889, отворена била Ајфеловата кула

По двегодишна изградба, на денешен ден, 31 март, во 1889 година, свечено пуштена во употреба била Ајфеловата кула, симбол на Париз и Франција.

По повод 100-годишнината од Француската револуција, француската Влада планирала меѓународен саем и за таа прилика објавила награден конкурс за споменик кој би се поставил на Марсовските полиња во центарот на Париз. Од стотина пријавени, Столетничкиот комитет го одбрал оној на Густав Ајфел за железна кула висока 300 метри која би била највисоката човекова градба во светот. Ајфел тогаш веќе бил докажан градител чија Статуа на слободата неодамна била поставена во Њујорк.

Конструкцијата почнала на 18 јануари 1887 година, а завршила на 15 март 1889. На 31 истиот месец во свечена церемонија Ајфел ја претставил кулата во присуство на францускиот премиер Пјер Тирар, 200 работници кои учествувале во изградбата и еден куп домашни и странски гости.

Денес, Ајфеловата кула е висока 330 метри и е најпосетувана туристичка локација во светот со речиси 7 милиони луѓе на годишно ниво кои плаќаат билет за да се качат.