9 ноември 1989, паднал Берлинскиот ѕид

На денешен ден, 9 ноември, во 1989 година почнал падот на Железната завеса на Стариот континент откако бил урнат Берлинскиот ѕид, симболот на поделената Европа.

По завршувањето на Втората светска војна Германија била поделена помеѓу САД, СССР, Обединетото Кралство и Франција. Поради различните политички вредности, Германија останала поделена, но на два наместо на четири дела: Западна Германија, која ги сочинувала деловите на САД, Обединетото Кралство и Франција, и Источна Германија со делот на СССР.

Главниот град Берлин се наоѓал на советска почва, но со договор и тој бил поделен на два дела. На 13 август 1961 година Советите започнале со изградба на Берлинскиот ѕид обиколувајќи го цел Западен Берлин, изолирајќи го од цела Источна Германија. Роднини и пријатели останале одделени, а голготата траела цели 28 години кога конечно бил урнат.

Конечното обединување на Германија се случило една година подоцна, на 3 октомври.