Јувентус се наоѓа во огромни проблеми, неодамна му одзедоа 15 бодови, а викендов претрпе понижувачки пораз на домашен терен од Монца.
Поради тоа „Старата дама“ падна на 12. место на табелата во Серија А, во долната половина, а тренерот Масимилиано Алегри е многу загрижен за тоа што се случува во клубот.
„Мораме да освојуваме бодови за да си го осигураме опстанокот во Серија А. Ситуацијата се сврте наопаку, но ова е реалноста во овој момент и тоа мораме да го препознаеме. Во спротивно, лошо ќе се заврши за нас“, рече италијанскиот стратег.
Иако Јуве всушност на зелениот терен има освоено 38 бодови, поради казната, наместо борба за Лигата на шампиони сега се бори да ја спаси сезоната. Иако зоната за испаѓање е сепак далеку, серија лоши резултати може да го донесе барем до опасност.
„Мораме да бидеме свесни за позицијата која ја имаме на табелата во моментов, а не да размислуваме за 38-те бодови што ги освоивме. Сега имаме 23 бода и мораме така да се однесуваме. Секој натпревар е одлучувачки, мораме што поскоро да излеземе од овој вител. Имаме еден бод од три кола и тоа не смее да се случува. Досега бевме непоразени дома“, заврши Алегри.
