Руските обвинувања дека Киев поседува биолошко и хемиско оружје се лажни и покажуваат дека рускиот претседател Владимир Путин самиот размислува да употреби таков вид оружје во војната против Украина, изјави американскиот претседател Џо Бајден.
„Путин изнесува нови лажни тврдења дека ние во Америка имаме биолошко како и хемиско оружје во Европа, а тоа едноставно не е вистина. Исто така, сугерира дека Украина има биолошко и хемиско оружје. Тоа е јасен знак дека размислува за користење на едното и другото“, изјави Бајден, без да го поткрепи тоа со докази.
Руската амбасада во Вашингтон не реагираше веднаш на барањето за коментар на оваа изјава
Функционери во Вашингтон и земјите сојузници и претходно ја имаат обвинето Русија за ширење недокажани тврдења дека Украина има програма за биолошко оружје, велејќи дека тоа го гледаат како можен вовед во потенцијално започнување на биолошки или хемиски напад.
Руското Министерство за одбрана го обвини Киев, без да даде докази за тоа, дека планира хемиски напад врз сопствениот народ за да ја обвини Москва за користење хемиско оружје во инвазијата на Украина.
