Американскиот претседател Џо Бајден објави дека американската војска го убила водач на ИСИС Абу Ибрахим ал Хашими ал Курајши во антитерористички напад во Сирија.
Станува збор за наследникот на Абу Бакр ал Багдади, кој беше убиен во слична операција во 2019 година.
„Американските специјални сили успешно спроведоа антитерористичка мисија во северозападна Сирија во средата навечер, елиминирајќи го лидерот на ИСИС Абу Ибрахим ал Хашими ал Курајши“, се вели во соопштението на Џо Бајден што го објави Белата куќа.
Во нападот загинаа најмалку 13 лица, меѓу кои шест деца и четири жени. Бомбата во која загинаа цивили била активирана од водачот на ИСИС, соопштија американските власти. Ова го потврди и американскиот претседател Џо Бајден при обраќањето до јавноста од Белата куќа.
Фотографиите од куќата нападната од Американците покажуваат дека третиот кат од куќата е целосно урнат. Според Бајден и американски официјални лица, бомбата што го разнела третиот кат од куќата била активирана од самиот водач на ИСИС, при што загинал тој и си го убил сопственото семејство.
Абу Ибрахим ал-Хашеми ал Курајши ја водеше ИД по смртта на нејзиниот основач Абу Бакр ал-Багдади, кој исто така беше убиен со активирање експлозив за време на операцијата на САД во 2019 година. Курајши беше многу таинствен откако го наследи Багдади кој ја водеше групата во височина на самопрогласениот калифат.огромни области на Сирија и Ирак под кои се наоѓале милиони луѓе.
По поразите на бојното поле пред речиси три години, ИД изврши герилски напади во Ирак и Сирија. Бројни џихадистички групи поврзани со Ал Каеда дејствуваат во северозападна Сирија, последното големо упориште на бунтовниците против претседателот Башар ал Асад во десетгодишната граѓанска војна. Таму се кријат и лидерите на ИД.
Хонорарниот новинар и активист Муса ал Хасан, кој ги следи конфликтите во Сирија, објави видео снимено во Атмех недалеку од куќата во која се криел лидерот на ИСИС.
На снимката јасно се гледа пукањето кое се случило кога Американците ја опколиле куќата во која се криел наследникот на Абу Бакр ал Багдади.
„Благодарение на храброста на нашите војници, овој страшен терористички лидер повеќе го нема. Му наложив на Министерството за одбрана да ги преземе сите мерки за да избегне цивилни жртви. Намерно испративме специјални сили и не употребивме напади со беспилотни летала за да избегнеме цивилни жртви. Терористот решил да го крене целиот трет кат во воздух, земајќи со себе повеќе членови од своето семејство, исто како и неговиот претходник“, рече Бајден.
„Засекогаш ќе им бидеме благодарни на нашите војници и членовите на нивните семејства“, додаде Бајден.
„Оваа операција сведочи за американскиот дострел и посветеност да ги уништи терористите каде и да се во светот. Ќе продолжиме да работиме со нашите партнери во Сирија и Ирак и со курдските пешмерга борци“, додаде Бајден.
„Оваа операција испрати силна порака до сите терористи ширум светот – ќе ве следиме и ќе ве најдеме“, рече Бајден.