Зачувување на работните места и креирање на нови можности за граѓаните, создавање на развојна и одржлива економија која носи предвидливост, намалување на сиромаштијата под 16 проценти, едноцифрен број на невработеноста и економски раст од четири проценти, се дел од приоритетите на кои ќе работи економскиот тим на Владата раководен од вицепремиерот Фатмир Битиќи.
На денешната прес-конферениција на која го презентираше мандатното писмо со кое го задолжил премиерот, Битиќи рече дека во следните четири години продолжува борбата за секое работно место и за креирањето на нови работни места со што ќе се отворат нови можности за граѓаните. Ги повика сите чинители на општеството – синдикатите, коморите и експертите заеднички да работат на креирање на платформа за економски развој на државата со која ќе се обезбеди подобар живот за сите граѓани.
– Нема еднострани чекори и мерки, туку заеднички чекори. Сите заедно ќе разговараме како може да се најдат мерки и да се креираат политики кои значат развој. Тоа нека биде повик денеска, а тоа го покажавме и досега со посетите на коморите и синдикатите, дека сакаме заедно да најдеме решенија. На крајот на денот, јас сакам да им служам на граѓаните и граѓаните да бидат консултирани за носењето на одлуките. Овие четири години заедно ќе ја градиме државата и ќе се бориме да покажеме колку си ја сакаме оваа држава, рече Битиќи.
Со цел навремено и транспарентно реализирање на буџетските расходи ќе се формира централна единица за поддршка на јавните инвестиции на владино ниво кое ќе обезбеди експертиза за реализација на капиталните инвестиции.
Вицепремиерот за економски прашања во четиригодишниот мандат најави и борба со сивата економија, развој на иновативни и нови технологии, дигитализација на општеството и прераснување на државата во регионален старт апт центар.
– Преку мојата координативна улога на економските ресори посветено ќе работам на трансформација на нашето општество во едно општество за сите во кое борбата со сиромаштијата и кризата ќе е заедничка и на сите јазици, во кои сите ќе гледаме кон зелената дигитална самоодржлива иднина без да се занимаваме со старите деструктивни однесувања кои не разделуваат, порача Битиќи.
