Обвинетиот Бојан Јовановски, на Јордан Камчев, му нудил да инвестира на локаци во Струга и Охрид за старечки домови, односно дека за ова инвестиција ќе добие 20 проценти субвенции од државата.
– Зоран Милески и Бојан Јовановски дојдоа кај мене и на маса ми ги дадоа локациите. Ми кажа дека Карпош е блокирано, Битола е зафатено. Сето ова чинеше 4 милиони евра, рече Камчев на денешното сведочење во Кривичниот суд за „Меѓународен сојуз“. Тој додаде дека од тимот на Бојан му биле презентирани копи-пејст бројки, и истите ги дал за анализа на неговите директори.
Сведокот Јордан Камчев посочи дека на сметка на 1ТВ платил 300 илјади евра, за два договора. Овие средства Камчев рече дека ги уплатил како рекет.
Во однос на улогата на обвинетата Јасна Мандиќ, сведокот Камчев, истакна дека таа била само пошта и дека истата не учествувала во разговорите меѓу него и обвинетиот Бојан Јовановски.
Освен Камчев, денеска сведочеше и Агапи Дика. Со сведочењето на лицата Јованка Кука и Лилјана Тодоровска, на 24 март е предвидено да продолжи судењето.
Обвинети во овој случај се Бојан Јовановски, поранешната пратеничка од редовите на СДСМ, Фросина Ременски, Миле Јовановски, (татко на првообвинетиот) и Јасна Мандиќ Ерцеговиќ.
Јовановски е обвинет за „измама и перење пари“. Ременски е обвинета за „помагање во делото измама“, Мандиќ за „помагање во измамата и перењето пари“, Миле Јовановски се терети за „помагање во перењето пари“ и за „неовластено изработување, држење, посредување и тргување со оружје“. Како правно лице обвинета е и невладината организација „Меѓународен сојуз“.
