Поранешната пратеничка на ВМРО-ДПМНЕ, Силвана Бонева, денеска се појави во Кривичен суд во Скопје, за случајот на СЈО, познат како „Друмарина“. Таа вели дека приложила 6.967 докази и има 28 сведоци со кои ќе докаже дека обвинението против неа е невистинито.
„Денеска започна судскиот процес што го води обвинителството против мене. Во овој судски процес со приложените 6.967 докази и 28 сведоци, ќе докажам и пред судот и пред јавноста дека обвинението поднесено против мене е невистинито и паушално, исто како што беа и големите лаги дека сум била рекордер во земањето на патни трошоци, големата лага дека сум купила станови со криминални пари и медиумскиот линч што со години беше спроведуван врз мене, врз основа на тие лаги“, стои во објавата на Facebook профилот на Бонева.
Таа додава дека досега се направени повеќе прекршувања на законите, за кои со претставка се обратила до Народниот правобранител, кој врз основа на приложената документација, покрена постапка со цел заштита на нејзините права .
„Исто така ги информирав и Делегацијата на ЕУ, Mисијата на ОБСЕ, повеќе амбасади и Коалицијата Сите за правично судење и побарав од нив да го следат судскиот процес. Досега добив одговор од Делегацијата на ЕУ, Mисијата на ОБСЕ и Коалицијата Сите за правично судење дека ќе го следат случајот од аспект на почитување на законите и правото на фер и правично судење. Борбата за правдата и вистината продолжува!“, категорична е Бонева.
