На 25.12.2023, со почеток од 20 часот, во малата сала на Филхармонијата ќе се одржи концерт на скопскиот „Брас квинтет“ со наслов „Брас фантазија за Тоше“. На програмата ќе бидат најпознатите песни од дискографијата на Тоше Проески, преработени за лимени дувачки инструменти.
Идејата за овој концерт потекнува од минатите концерти на квинтетот со програма од разни популарни композиции од групи, како „The Beatles“, „Queen“, Мајкл Џексон, „Bee Gees“ и сл.
Истите овие композиции се појавувале и во образовниот процес на секој од членовите на квинтетот по предметот камерна музика.
Оттука идејата за изработка на квалитетни аранжмани, кои во себе ќе ја содржат музиката од познатите хитови што Тоше ги пееше, изведени преку автентичниот звук на лимените дувачки инструменти преку креативното перо на Трајко Велков и Зоран Костадиновски. Предизвикот да се сработат партитурите и индивидуалните штимови е огромен имајќи ги предвид нивната комплексност и виртузноста, преку кои аранжерите го покажуваат своето широко познавање за оваков вид ансамбл, како и лимените дувачки инструменти (впрочем, самиот Трајко Велков ѝ е познат на јавноста како џез-трубач, присутен на речиси сите настани поврзани со џез-музиката), вели организаторот.
По неколкуте изведби предвидени во 2024 година, овие аранжмани ќе бидат подарени на музичките образовни институции со цел тие да влезат во редовната програма, која идните студенти инструменталисти ќе ја изведуваат во текот на своето школување.