Цените на нафтата се стабилизираа на меѓународните пазари во петокот над нивото од 84 долари, поддржани од честите индикации за нормализирање на побарувачката во Кина по олеснувањето на мерките за борба против Ковид.
На лондонскиот пазар цената на барелот по пладне беше повисока за 31 цент од вчерашното затворање на тргувањето и изнесуваше 84,34 долари. На американскиот пазар со барел се тргуваше за 44 центи поскапо, по цена од 78,83 долари.
На крајот на неделата, трговците се фокусираа на чести знаци на зајакнување на побарувачката во Кина по укинувањето на строгите ограничувања за пандемијата.
Тие беа охрабрени од зголемениот откуп на нафта и обновувањето на патниот сообраќај. Аналитичарите на ANZ укажуваат на скок на индексот на густина на сообраќај во 15 кинески градови за 31 отсто во споредба со претходната недела.
Понудата би можела да биде намалена поради најавените нови западни санкции за руската нафта.
Групата Г7 и нејзините сојузници ја ограничуваа цената на руската нафта на 60 долари на почетокот на декември, а ЕУ воведе ембарго на руските барели испорачани со бродови истиот ден. На почетокот на февруари Унијата планира да ја прошири забраната за увоз на руските нафтени деривати.
Русија одговори со петмесечна забрана за продажба на нафта на земјите кои ја ограничија нејзината цена.
„Трговците сметаат на пораст на цените со оглед на очекуваните дополнителни намалувања на понудата од Русија и нормализирањето на кинеската побарувачка за гориво“, објаснува Стивен Бренок од PVM.
Цените вчера беа поддржани од послаб долар по ублажувањето на инфлацијата во САД во декември, што ги поттикна надежите дека американската централна банка ќе го олесни темпото на зголемување на каматните стапки.
Послабиот долар ја помага побарувачката бидејќи ја зајакнува куповната моќ на купувачите во други валути.
Организацијата на земјите извознички на нафта (ОПЕК) денеска одделно објави дека цената на барел од нафтената кошничка на нејзините членки во четвртокот пораснала за 2,60 долари на 80,73 долари.
