Ламине Јамал (15) стана најмладиот играч во историјата кој играл за Барселона. Тој во игра влезе во 83. минута од натпреварот од 32. коло на Ла Лига меѓу Барселона и Бетис (4:0) на 15 години, девет месеци и 16 дена.
Така, тој го собори рекордот кој 101 година го држеше Арманд Мартинес Саги, кој дебитираше за Барселона во 1922 година кога беше два месеци постар од денешниот Јамал. Јамал стана и петтиот најмлад играч во историјата на шпанското првенство.
Играта на Јамал ја пофали и Чави на прес-конференцијата по натпреварот.
„Ламине беше многу добар. Му реков да се обиде да биде опасен и тој го направи тоа. Замислете, тој има само 15 години! За малку ќе постигнеше гол. Тој е посебен, полн е со самодоверба и може да стане важен играч за нас. Доволно е да го гледате на тренинг за да го разберете тоа“, рече тој.
Еден новинар потоа го праша дали може да го спореди со Лионел Меси и Ансу Фати, кои исто така дебитираа во Барселона на многу млада возраст.
„Да, тој е сличен на нив. Тој е многу талентиран во задната третина. Тој е играч кој може да обележи цела една ера на Барселона", одговори Чави.
Јамал моментално е еден од најголемите таленти во школата „Ла Масија“ во Барселона, а Чави го повика да тренира со сениорскиот тим за прв пат во септември. Инаку, тој настапува за У-19 тимот на Барса, за кој оваа сезона на 28 настапи постигна осум гола и исто толку асистираше. Тој е и актуелен У-19 репрезентативец на Шпанија.