Европската Унија оваа недела треба да претстави пакет предложени вонредни мерки за ублажување на енергетската криза, но земјите-членки се поделени по прашањето за ограничувањата на цената на гасот.
На состанокот во петокот, министрите за енергетика на земјите од ЕУ побараа од Европската комисија да подготви нацрт-мерки за ограничување на вишокот приходи на производителите, како и за севкупното намалување на потрошувачката на електрична енергија во ЕУ.
Се слушнаа и барања за изработка на предлог за ограничување на цената на гасот со цел да се намалат се поголемите износи на сметките за струја. Треба да се истакне дека во земјите членки на ЕУ нема консензус по ова прашање, а одредени струи сметаат дека новите мерки дополнително ќе ја влошат енергетската криза.
Претседателката на Европската комисија, Урсула фон дер Лајен, најави дека интензивно бараат заедничко решение кое ќе ги намали цените, но и ќе обезбеди трајно снабдување со гас.
Потсетуваме дека пред војната во Украина, Русија обезбедуваше околу 40% од вкупните количини на гас во ЕУ, што сега е намалено на само 9%. Русија го оправдува намалувањето на испораката на гас со технички тешкотии кои се последиците од западните санкции.
