Бројот на германски војници падна на 181.500, и покрај големите владини напори да го зголеми нивниот број, објави германското Министерство за одбрана.
Тоа значи дека на крајот на минатата година, во Бундесверот имало околу 1.500 помалку професионални војници и доброволци кои служеле воен рок од една година претходно. На крајот на 2022 година ги имало 183.050.
Примарна цел на армијата останува одржливо јакнење на подготвеноста на нејзиниот персонал, изјави портпаролката на министерството.
„Потребни ни се квалификувани и оперативно подготвени мажи и жени, доволни за задачите и мисиите што претстојат“, рече таа.
Германската цел е до 2031 година бројот на војници да порасне на 203.000. Поради падот на бројот на војници, деновиве се расправа за повторно воведување на задолжителен воен рок или регрутирање на војници кои не се германски државјани.
Во Германија, во 2011 година, по 55 години, задолжителниот воен рок беше суспендиран, но не и укинат.
Руската инвазија на Украина во февруари 2022 година го потресе германскиот одбранбен естаблишмент, предизвикувајќи голем број промени, вклучително и зголемување на воениот буџет и загриженост за севкупната борбена готовност.
