Привремената блокада на Суецкиот Канал им овозможи на Русија и Кина подобро да ги промовираат своите трговски патишта и да го оспорат американскиот модел на глобализација, сметаа францускиот економски специјалист Франсоа Лангле во коментарот објавен денеска во Le Figaro.
„Економските последици од инцидентот може да бидат незначителни, но геополитичките постојат. Веднаш по насукувањето на бродот Ever Given, Русија предложи алтернативна рута помеѓу Истокот и Европа што е за пет илјади километри пократка отколку преку Суецкиот Канал. Кина го направи истото со Поларниот пат на свилата“, смета Лангле.
Тој нагласува дека можноста за создавање трговски патишта и нивно контролирање отсекогаш се сметало за обележје на моќ.
Новинарот потсетува дека Суецкиот Канал го граделе Европејци, вклучително и Французите. По Првата светска војна, Велика Британија беше одговорна за неговата одбрана.
„Наскоро им отстапи место на новиот светски лидер, Соединетите Американски Држави, кои ги контролираа трговските патишта во текот на 20 век“, вели Лангле.
„Денес американската доминација е оспорена од Кина и Русија, кои сакаат да понудат сопствен модел на глобализација преку своите трговски патишта“, заклучува тој.
Суецкиот Канал носи 12 проценти од светскиот товарен сообраќај и исто така е еден од најпрометните водни патишта за испорака на нафта во светот. Осум проценти од бродовите кои носат течен гас минуваат низ него. 19.000 бродови поминуваат низ каналот секоја година или повеќе од 50 на ден.