Актуелниот претседател на САД, Доналд Трамп, разгледал можност за предвремено помилување на четворица свои блиски луѓе, по претходните најави дека тоа се подготвува и за личниот адвокат Руди Џулијани.
New York Times дознава дека се работи за Доналд Трамп Џуниор, ќерките Ерика и Иванка Трамп и сопругот на Иванка, Џаред Кушнер, советник во Белата куќа.
Трамп Џуниор беше под истрага на обвинителот Роберт Малер поради тоа што со Русите споделил штетни информации за Хилари Клинтон, противкандидат на Трамп на претседателските избори во 2016 година.
Кушнер пак, дал лажни изјави на сојузни органи за неговите контакти со странски лица за да добие дозвола за пристап до доверливи информации, што сепак ја добил, по наредба на претседателот.
Весникот наведува дека Иванка и Ерика пак можат во блиска иднина да станат предмет на истрага за прикривање милиони долари исплати за консултација на компанијата Organisation Trump за избегнување да се плати данок.
Се наведува дека по инаугарцијата на Џо Бајден во јануари, нeговото Министерство за правда може во одмазда да подигне обвиненија против блиските на Трамп, оние кои ја креираа неговата политика изминативе четири години.
Според познавачите, предвремено бланко помилување, еден вид на имунитет од идни обвиненија или осуди, е крајно невообичаена практика во американската политика. Но сепак, има историски преседани.
Претседателот Џорџ Вашингтон, на пример, на тој начин ги ослободил заговарачите на Востанието за виски во 1791 година. Најпознат е примерот кога претседателот Џералд Форд го помилува Ричард Никсон од сите негови незаконски акции како претседател. Додека, пак, Џими Картер, помилува илјадници Американци за незаконско избегнување регрутација за да не бидат пратени на фронтот во Виетнамската војна.
Трамп ја користи својата надлежност за давање милост во случаи кои се поврзани со него лично или за луѓе кои имаат директен пристап до него преку пријатели или семејство.
