Данска сака да ја намали возраста за абортус без согласност на родителите од сегашните 18 на 15 години, идентично со старосната граница за согласност за сексуален однос, соопшти денеска министерката за родова рамноправност Мари Бјер.
Владата ова го соопшти на 50-годишнината од донесувањето на законот со кој на жените им се даде целосно право на абортус.
Во 1973 година, Данска беше меѓу првите европски земји што го стори тоа. Претходно, на жените им требаше лекарска дозвола. На тинејџерките помлади од 18 години во нордиската земја веќе им е дозволено да абортираат, но со дозвола на нивните родители.
„Абортусот може да се поврзе со многу емоции, чувства на вина и срам. Барањето согласност од родителите за помлади од 18 години може да биде понижувачко и да има сериозни последици“, напиша Бјер на Twitter.
„Сакаме да го промениме за младите да можат да изберат дали да ги вклучат своите родители“, додаде таа.
