Свет

Давос 2019: Заборавете на Кашоги, да зборуваме за бизнис

24. јануари 2019 - 17:52 | А.С.

Ако некако сте ја пропуштиле веста за убиството на новинарот Џамал Кашоги, можеби ќе помислите дека Саудиска Арабија е ѕвезда на економскиот форум во Давос.

Кралството ја прати една од своите најсилни делегации досега во швајцарскиот планински ентар и ги узурпираше салите за состаноци со своите врвни раководители.

Саудиска Арабија успеа да ги убеди водечките западни бизнисмени за панел дискусија на тема „Следниот чекор за Саудиска Арабија“, каде главниот извршен директор на француската компанија Total, Патрик Понан, и шефот на Morgan Stanley, Џејмс Горман, разговараа со министрите за економија и за финансии на Саудиска Арабија.

Овој собир е шанса за Саудијците да се обидат зад севе да ги остават месеците интензивни критики поради убиството на Кашоги, но и критиките на адреса на престолонаследникот Мохамед бин Салман.

Принцот претходно уживаше восхит на Запад поради длабоките промени што ги направи во неговата татковина, како даночните реформи, инфраструктурните проекти и укинувањето на забраната за жените да возат автомобил.

Во Давос се чини, на сѐ се гледа поинаку.

Швајцарскиот претседател, според Reuters, изјавил дека неговата земја продолжила понатаму и дека сака да изгради стабилни односи со Ријад, богатото кралство за производство на нафта кое е главен светски инвеститор.

„Одамна се занимававме со случајот Кашоги... Се договоривме да го продолжиме финансискиот дијалог и да ги нормализираме односите“, изјавил претседателот пред новинарите.

Секако, имаше сомнежи околу статусот на Саудиска Арабија во Давос. Сепак, голем број светски инвеститори се откажаа од големата конференција што се одржа во октомври, за идните проекти на Саудиска Арабија, токму поради тие тензии.

Потоа, на самитот Г20 во Буенос Аирес, светските лидери се чини го игнорираа принцот Мохамед на сцената додека се фотографираа, иако многу од нив потоа имаа билатерални средби со него зад затворени врати.

Меѓутоа, во Давос саудиската делегација веќе одржа десетина состаноци и ниту еден западен инвеститор се нема повлечено, изјави за Reuters саудискиот министер за економија Мохамад ал Туваиџри.

„Наша работа како влада е да се осигураме дека инфратсруктурата, особено легалната, е стабилна. Се надеваме дека ова патување ќе привлече инвеститори“, рече тој.

Неговата порака за принцот би била „да ги сослуша повратните информации од инвеститорите“.

Министерот за финансии Мохамед ал-Џадан изјави дека „е тажно тоа што се случи со Џамал“, но исто така предложи да се почекаат резултатите од истрагата и од судењето.

Тој додаде дека фактот дека вредноста на саудиските хартии од вредност се зголемува укажува дека се враќа довербата на инвеститорите.

Најновите податоци од Саудиска Арабија покажуваат дека новите дозволи за странски инвестиции двојни се зголемиле лани во споредба со 377 во 2017 година.

Светскиот економски форум избра две државни саудиски компании - Aramko и Sabik – што ќе бидат меѓу 100-те стратешки партнери за 2019 година.

Коментирај