Британскиот премиер Риши Сунак денеска објави дека има намера да ја продолжи забраната за цигари за постепено да ја направи Велика Британија земја без тутун, како и предлог за бонуси на наставниците и ветување за идни даночни намалувања.
„Предлагам во иднина да ја зголемуваме (законската) возраст за продажба на цигари за една година секоја година“, рече лидерот на конзервативците за време на говорот на конгресот на неговата партија во Манчестер.
„Ова значи дека на денешното 14-годишно дете никогаш нема законски да му се продаваат цигари“, рече тој, мислејќи на идната „генерација без тутун“. Според предлогот претставен од Сунак, старосната граница за забрана ќе се зголемува за една година секоја година, што би значело дека младите ќе растат без тутун, што во целина би ја подобрило здравствената состојба на нацијата.
Во моментов, дозволената возраст за купување цигари во ОК е 18 години. Но, четворица од пет пушачи почнале пред да наполнат 20 години, рече Сунак.
„Се обидуваме да ги спречиме тинејџерите да почнат да пушат. Ова би можело да овозможи речиси целосно да се елиминира пушењето кај младите уште во 2040 година“, се вели во соопштението на Даунинг стрит.
Употребата на тутун е водечка причина за смрт што може да се спречи во Велика Британија, се вели во соопштението. Предизвикува приближно една од четири смртни случаи од рак. Трошоците направени, особено за здравствениот систем, „се 17 милијарди фунти секоја година“, или речиси 20 милијарди евра.
Предложените мерки се слични на оние кои минатата година ги објави Нов Зеланд, која стана првата земја која забрани купување цигари на генерацијата родени по 1 јануари 2009 година. Забраната ќе стапи на сила во 2027 година. Сунак, исто така, наведе голем број планирани промени во образовниот систем, вклучувајќи бонус без данок до 30.000 фунти за привлекување наставници по клучните училишни предмети.
„Денес можам да објавам, за да привлечам и задржам повеќе наставници, дека оние кои предаваат клучни предмети во училиштата, и за прв пат во нашите колеџи, ќе добијат специјални бонуси до 30.000 фунти без данок за првите пет години од нивната кариера“, рече тој.
Сунак, исто така, вети дека ќе ги намали даноците штом инфлацијата ќе биде под контрола, по зголемената загриженост меѓу членовите на Конзервативната партија за зголемување на даноците поради пандемијата на COVID-19. Во текот на оваа година, Сунак и неговиот министер за финансии Џереми Хант рекоа дека нивниот приоритет е да се преполови инфлацијата - која достигна 41-годишен максимум од 11,1 отсто во октомври 2022 година.
Но, намалувањето на даноците би претставувало ризик за постигнување на таа цел. Сепак, многу членови на партијата се нетрпеливи за даночните намалувања, пред изборите кои најверојатно ќе се одржат следната година, особено кога конзервативците ја следат опозициската Лабуристичка партија на анкетите.
Британскиот премиер најави и дека се откажува од продолжувањето на големиот инфраструктурен проект - линијата за брз воз што ќе го олесни пристапот до северот на земјата, но чии трошоци нагло се зголемија.
„Го откажувам остатокот од проектот HS2“, рече лидерот на конзервативците.
„Наместо тоа, ние ќе го реинвестираме секој денар, 36 милијарди фунти (41 милијарди евра) во стотици нови транспортни проекти“, вети тој.
„Она што навистина ни треба е подобри транспортни врски на север“ и тоа „ќе биде наш приоритет“. HS2 (High Speed 2), вториот проект за брз воз во Обединетото Кралство по оној што го донесе Еуростар до тунелот под Ла Манш (HS1), првично беше наменет да го поврзе британскиот главен град со Бирмингем , потоа со Манчестер и Лидс. Но, по Бирмингем ќе престане.
