Скопје, 6 април 2018 (МИА) - Министерството за внатрешни работи информира дека на местото на вооружениот инцидент што вчера се случи во Мала Речица, при што е убиено едно лице, биле пронајдени осум чаури од пиштолска муниција, еден неиспукан куршум од пиштолска муниција, три зрна од куршуми и една безбол палка.
МВР наведува дека вчера 18.20 часот пријавено е пукање од огнено оружје во с.Мала Речица, тетовско. Повредени биле Н.Р. (46) од с.Белановце, општина Липково, кој во Клиничката болница Тетово им подлегнал на повредите, Ф.М. (22) од с.Черкези, кумановско, кој бил пренесен во Ургентниот центар при комплексот клиники „Мајка Тереза“-Скопје и С.Р.(41) од с.Белановце, општина Липково, кој бил задржан во болницата во Тетово.
Приведени се четири лица и задржани во СВР Тетово за понатамошна постапка.
Увид на местото на настанот извршиле Јавен обвинител и увидна екипа на СВР Тетово.
МВР додава дека се преземаат мерки за целосно расчистување на случајот.
