Холивудски сценарист и продуцент ги обвинува Disney дека ја копирале идејата за еден од нивните оскаровски филмови.
Гари Голдман, кој има работено на филмовите „Total Recall„ и „Minority Report“, ја тужи филмската компанија со тврдење дека елементи од анимираниот филм „Zootopia“ се базирани на негови дела.
Тој вели дека „Disney“ ги копирале темите, сценографијата, заплетот, ликовите и дијалогот, како и насловот од неговиот концепт Zootopia.
Голдман исто така тврди дека ја предложил идејата пред студиото во 2000 и во 2009 година.
Во тужбата се наведува дека „Disney“ работи „во култура каде не само што се прифаќа кршење на авторските права, туку истото и се поттикнува и охрабрува“.
Голдман бара отштета, вклучувајќи дел од продажбата на сувенири поврзани со анимираниот филм.
„Zootopia“ заработи над 1 милијарда долари на киноблагајните ширум светот од премиерата во март, 2016 година, а минатиот месец освои Оскар за најдобар анимиран долгометражен филм.
