Еден од најпопуларните музичари на светската рап сцена, Еминем, денеска го слави својот 50-ти роденден, а тоа не е единствената импресивна бројка што ја достигна оваа година - одбележа и 14 години откако е трезен.
Раперот, чие вистинско име е Маршал Матерс, е трезен веќе 14 години, а изминатите години не ја криеше од јавноста борбата што ја имаше со зависноста од лекови против болки и лекови за анксиозност.
Неговиот проблем со лекови против болки започна за време на снимањето на хит филмот „8 Mile“ од 2002 година, каде раперот играше една од улогите.
Зависностаа кулминираше со инцидент во 2007 година, кога Еминем речиси фатално се предозира. Тоа беше повик за будење што не само што го поттикна да се отрезни, туку и да се врати на музиката во која тогаш заборавил да ужива.
Минатиот месец Еминем размислуваше за неговото закрепнување и тешкиот животен период зад него.
„Се сеќавам кога првпат се отрезнив и сè ми беше недостапно, се сеќавам дека бев навистина среќен и сè беше повторно сосема ново“, изјави раперот.
Албумот „Relapse“ што го издаде во тоа време беше првиот во кој раперот уживаше по долго време.
„Тоа беше како да почнав повторно да се забавувам со музика и повторно да учам како да рапувам. Ми требаше многу време за да ми проработи мозокот“, рече тој.
Еминем е трезен од 20 април 2008 година и изјавил дека првично бил многу загрижен што не претрпел трајно оштетување на мозокот.
Тој исто така претходно спомна дека неговата зависност во еден момент била толку лоша што земал и по 20 таблети дневно.
„Користев апчиња секогаш кога можев. Земав сè што ќе ми дадеа“, изјави претходно.
Потоа ги заменил таблетите со вежбање, продолжувајќи ги музичките достигнувања. За ова животно искуство зборуваше во „Revival“, неговиот деветти студиски албум кој беше објавен во декември 2017 година, додека последниот што го објави беше „Music to Be Murdered By“ од 2020 година.
